Miðvikudagskvöldið 10. febrúar næstkomandi verða tónleikar á kaffihúsi Hemma og Valda á Laugavegi.

Fram koma trúbadorarnir og söngskáldin Uni, Jón Tryggvi og Wolfie. Uni heitir réttu nafni Unnur Arndísardóttir og Wolfie er Ingólfur Þór Árnason úr Indigo dúettnum.

Tónlistarfólkið lofar notalegu kósýkvöldi þar sem ljúfir tónar gítars og söngs fá að njóta sín. Frítt inn.

Íbúar Rio De Janeiro í Brasilíu eru æfir yfir þeirri ákvörðun svonefnds Viradouro-hóps að velja sjö ára stúlku, Juliu Lira að nafni, til að gegna hlutverki sambadrottningar á árlegri samba-stórhátíð borgarinnar.

Hlutverk sambadrottningarinnar hefur hingað til að jafnaði verið í höndum fáklæddra fyrirsæta, sem minna helst á klámdrottningar og er ætlað að æsa upp mannfjöldann í trylltan dans. Þykir mörgum því verulega undarlegt að sjö ára stúlka, sem er einmitt dóttir forseta Viradouro-hópsins, skuli gegna því hlutverki.

Dómari nokkur hefur hótað því að koma í veg fyrir að stúlkan stígi á stokk, en pabbinn stendur fastur á sínu og segir: „Sá maður sem horfir á sjö ára barn og finnur fyrir einhvers konar örvun ætti að fara til læknis.“

Jamie Lynn Spears, litla systir Britney Spears, er hætt með barnsföður sínum, Casey Aldridge, samkvæmt slúðurtímaritinu UsWeekly.

Annað blað, Star Magazine, heldur því fram að hin 18 ára Jamie Lynn sé þegar búin að finna sér nýjan karl. Sá er 28 ára náungi að nafni James Watson og sagður vera mikil viðskiptastórlax.

Já, Spears-systurnar kunna þetta. Nú bíðum við bara spennt eftir fréttum af frekari barneignum.

Áhorfendum Super Bowl í gærkvöldi brá heldur betur í brún í auglýsingahléi þegar þar birtist auglýsing sem skartaði sjónvarpsþáttastjórnendunum David Letterman, Jay Leno og Oprah Winfrey – öllum í einu!

Letterman, Leno og Winfrey hafa verið í harðri samkeppni undanfarin ár og þykja þetta þvi stórtíðindi í sjónvarpsgeiranum. Verið var að auglýsa Late Show, sjónvarpsþátt David Letterman.

Auglýsinguna má sjá hér að neðan.

Sala tónlistar á vefnum Tónlist.is hefur aldrei verið meiri en í síðasta mánuði. Samanborið við janúarmánuð 2009 jókst salan í janúar 2010 um 120%.

Forsvarsmenn Tónlist.is rekja aukninguna að miklu leyti til þess að ákveðið var að taka læsingar af seldu efni (DRM læsingar) og þá var farið í mikla markaðsherferð með Símanum síðastliðið sumar.

Söluaukningin er athyglisverð í ljósi þess að á sama tíma hefur ólöglegt niðurhal aukist. Rennir það stoðum undir þá kenningu margra að áhrif ólöglegs niðurhals á tónlitsarsölu séu ekki neikvæð, eins og almennt er haldið fram, heldur geti þau verið jákvæð.

Gamanleikarinn Robin Williams hlær ekki mikið í dag. Í gærmorgun var úrskurðað fyrir rétti að hann fengi engar bætur vegna kvikmyndar, sem hann var ráðinn til að leika í, en úr því varð aldrei.

Kvikmyndafyrirtækið Gold Circle Films ætlaði upphaflega að framleiða myndina, sem átti að heita A Couple of Dicks, en það gaf frá sér réttinn. Warner Bros tók við handritinu og gerði myndina með Bruce Willis undir nafninu Cop Out.

Williams krafðist þess að fá sex milljónir dollara í skaðabætur en dómarinn sagði: „Ó nei gamli minn!“

Fjórðu Duplex-tónleikarnir verða haldnir á Sódóma og Batteríinu annað kvöld, laugardagskvöldið 6. febrúar. Duplex er haldið fyrsta laugardagskvöld hvers mánaðar,

Annað kvöld troða upp hljómsveitirnar Ultra Mega Technobandið Stefán, Sometime, Cliff Clavin, Reykjavík!, Tonik, Dynamo Fog, Mukkaló og Futuregrapher.

Húsið opnar kl. 21 og dagskrá byrjar stundvíslega kl. 21:30.

Jónsi úr Sigur Rós er á leiðinni í tónleikaferð um Bandaríkin og Kanada til að fylgja eftir fyrstu sólóplötu hans, Go, sem kemur út 22. mars næstkomandi.

Tónleikaröðin hefst á tveimur tónleikum í Vancouver 6. og 7. apríl. Dagskráin er svo þéttskipuð fram í maí, en meðal annars mun hann koma fram á Coachella-hátíðinni í Kaliforníu.

Annað kvöld, föstudaginn 5. febrúar, verður þriðji Afleggjari X-ins 977 haldinn á Sódóma Reykjavík. Fram koma hljómsveitirnar Kimono, Mammút, Úlpa og Morðingjarnir og ætti því að vera óhætt að lofa góðu stuði. Miðaverð er 1.000 krónur og opnar húsið klukkan 23.

Leikarinn Mel Gibson var í sjónvarpsvíðtali að kynna nýjustu kvikmynd sína, Edge of Darkness, sem var frumsýnd í Bandaríkjunum um helgina.

Eins og margir muna eftir komst Gibson í kast við lögin fyrir nokkrum árum vegna drykkjuskaps og lét hann út úr sér niðrandi ummæli um gyðinga. Þáttastjórnandinn spurði Gibson ítrekað út í þessi atvik og hvort hann héldi að almenningur hefði fyrirgefið honum. Leikarinn var allt annað en sáttur við þetta.

Kíkið á myndbandið fyrir neðan og horfið til enda.